剝削合約員工 政府機器甩轆

香港公務員不愧係一個龐大自私集團，永遠先天下之樂而樂，後天下之憂而憂，對市民係咁，對同僚都係咁。

咦，又話係自私集團，點解會刻薄同僚呢？聽落好矛盾喎。其實無矛盾，事關喺政府返工唔一定係公務員o架，好似非公務員合約（NCSC）員工咁，無錯同公務員工作於同一屋簷下，但係同工不同酬，等如被人合法剝削。

嗱，立法會尋日開會，就有議員炮轟政府長年濫用NCSC計劃，簡直係無良僱主！工聯會王國興係咁講嘅，NCSC計劃已經變成一種剝削僱員制度，導致公務員青黃不接，影響服務質素，製造內部分化，破壞政府形象，要求官老爺提交解決時間表。

身為無良僱主嘅港府有乜回應呢？咪又係拖得就拖嗰一套，公務員事務局局長鄧國威話喎，部分長年資NCSC員工並非服務同一崗位，又話部分職位屬暫時性、季節性或兼職性，難以由公務員替代，但承諾會視乎每年資源多寡，爭取將更多NCSC員工轉為公務員咁話。

估唔到公務員唔止自私效率一流，耍太極嘅功夫更加一流。政府承諾將NCSC員工轉為公務員講咗N年啦，結果NCSC員工人數咪又係年年差唔多。幾年前有一萬四千人，家陣又係一萬四千人，當中接近一半更加服務政府三年以上，官老爺嘅空頭支票要開到幾時呀？

員工就係政府機器嘅螺絲，NCSC員工怨氣沖天，士氣低落，唔怪得政府施政水平每況愈下啦。試諗吓，大家做同樣嘅工作，但係人工福利比隔籬嗰個差一截，最慘隔籬嗰個通常仲係一件死蛇爛鱔大懶蟲，畀着你都無心機做嘢啦。一旦政府機器出事，部門服務唔係甩漏就係甩轆，政府又點樣實踐「適度有為」目標呀？

仲有呀，政府帶頭做無良僱主，以後呼籲商界做良心僱主，等如一個打劫積犯鬧銀行劫匪胡作非為，笑大人個口啦。近年勞資角力白熱化，最低工資都未拗完，輸入外勞爭議又隨時引爆，如果連政府都對剝削員工樂此不疲，無良僱主有樣學樣，仲唔千方百計榨盡打工仔咩？政府想營造和諧，其實破壞和諧嘅就係自己。

合約員工被歧視，港府剝削何時了？唔好再拖嘞，「非公務員合約制」變成「非公平合約制」，鄧國威快快撥亂反正。嗱，你唔做都得嘅，自動減五成人工啦，等你試吓同工唔同酬嘅氣頂心情，叮！