SUN搞作：大條道理：吹響廢渣的集結號！

作為一個男人，點為止廢渣呢？怕老婆？驚女朋友？吓吓報到？唔敢出去玩？通通都唔算。喺呢個網絡時代，最廢渣嘅，莫過於為咗取悅自己伴侶，竟然不惜將自己嘅衰樣放上網，仲要求網友幫手求情。

嗱，曾經有一位仁兄，只不過係想買一隻兔仔返屋企，佢老婆大人竟然要佢喺fb收集到一百萬個likes先批准。喂，大佬吖！買唔買兔仔係你哋小倆口嘅事，關我咩事？第一我唔識唔位兄台，第二，一睇阿兄台個樣就知係外國人，相差十萬八千里嘅一個家庭，買唔買一隻兔仔，竟然要我撐？郁啲就求人，仲係男人嚟嘅？廢渣！

不過，講到廢，都唔及另一位網上熱傳嘅哥哥仔。嗱，唔知佢點樣激嬲咗佢女朋友啦，家吓竟然要跪地扭耳仔，求網友畀一百五十個likes佢，等佢可以哄番佢女朋友。嘩，小編真係好想問吓各位女士，要嬲到一個咩地步，先會推個男朋友出去畀全世界嘲笑？你男朋友咁廢嘅一面畀全世界見到晒，你真係會要番佢？小編奉勸呢位朋友，贏咗個女仔，輸咗尊嚴同自己，唔化算喎！

唉，其實，計小編話齋，如果啲高官們都可以好似呢啲廢渣咁對香港人負責就好啦。打個比喻，如果貪曾老婆又係咁，要貪曾上網收集likes，例如收集到一百萬個likes就同全港市民道歉之類嘅話，就好囉。我諗，應該至少會有七百萬個likes啦吓話？

其實，好似呢啲咁嘅廢渣，喺香港，真係比比皆是。話唔定，喺你身邊已經有幾個。嗱，如果你發現你身邊都有啲咁嘅人嘅話，唔好諗啦，摑醒佢啦！