政壇：搞搞政：發展大嶼山動議鬧雙胞

下個月六號嘅立法會大會，動議辯論嘅議題竟然鬧雙胞。話說建仔Ben陳恒鑌同富貴黨方剛都抽到提動議辯論，前者講「建設新北大嶼山」，後者就講「發展大嶼山」。

查實阿Ben喺去年十一月已開始抽籤提動議辯論，當時嘅題目係「建設宜居東涌」，但就抽極都抽唔中，去年十二月中仲撤回咗添。佢早排再拎番出嚟，但就改咗個題目為「建設新北大嶼山」，仲即刻抽中咗。唔通佢知施政報告會講發展大嶼山，所以特登改題目？奈何一直都冇變過題目嘅方剛咁就畀人成功搶閘。

阿Ben否認收到風，仲話建仔嘅地區同事不嬲都覺得成個大嶼山都要發展，尤其係北大嶼山，所以話不如將個題目拉闊啲，等議員發表多啲唔同意見。

埋門畀人搶閘嘅方剛就慨嘆︰「咁多次都抽唔到，依家就同建仔撞到正。」但因為阿Ben抽到喺佢前面，只好認命。