政壇：曾智明唔熟黎瑞恩金曲

中華總商會青年委員會早前換屆，由冧莊咗兩屆主席嘅Ricky曾智明交棒畀德昌（有記）企業創辦人Alfred李德剛。前晚一班青委拉大隊兼載歌載舞歡送Ricky。

兩杯黃湯落肚嘅Ricky即歌王上身大獻歌喉，佢笑笑口咁話乜嘢歌都識唱，但問到識唔識唱前歌手太太「小恩子」黎瑞恩嘅金曲《一人有一個夢想》時，佢就話唯獨係老婆啲歌唔係咁熟喎！

唔知小恩子聽到會唔會幫老公勤練自己啲歌呢？身兼中總副會長嘅Ricky拍心口同大家保證，未來同大家嘅感情只會有增無減，事關協助青委發展，都係佢呢個副會長嘅職責喎！