政壇：劉江華副局「處男」赴立會

政制及內地事務局副局長劉江華尋日處男下海，去咗佢嘅舊地盤立法會開會。劉副局講過佢負責做內交工作，多啲同內地溝通。觀乎佢尋日去立會政制及內地事務委員會，獨自承擔起匯報私隱專員公署工作嘅環節，應該會跟番人權事宜。政制及內地事務局局長譚志源就話，劉副局仲會處理反性傾向歧視嘅諮詢。咁佢有無機會掂吓政改呢？佢就話政改全世界都要落水，全民皆兵，連律政司都要幫手喎！

唔少議員都為可以幫劉副局「開齋」非常雀躍，社民連梁國雄仲特登整咗個牌諷佢「保皇牆頭草，敗部竟復生，遙知都是糞，為有腐臭臨」。有議員同譚志源講定，話立法會唔少人都同劉副局有唔少牙齒印，叫譚志源講清楚劉副局第日會負責乜嘢項目，局長答完，議員都唔多滿意，結果都係要劉副局「開金口」。