政壇：新丁議員忽然神勇

工聯會嘅立法會議員郭偉強喺施政報告答問大會當日，好幸運咁抽中咗第一個向特首CY梁振英提問，但唔知點解佢就講到口窒窒，仲成塊面紅晒添！大家以為作為新丁嘅佢，口才有待磨練啦，點知尋日佢就忽然神勇。

不再面紅紅口窒窒

郭偉強尋日喺立法會開公務員及資助機構員工委員會會議上，就非合約公務員員工冇得轉做公務員問題，質問公務員事務局局長鄧國威。原本非公務員合約員工做得耐都可能會轉做公務員，但郭偉強就嫌當局手腳慢，話「現時有五年經驗嘅已經有四千幾個，點解決呢個數字，好遺憾！」又批評政府用陰招，「自力更新計劃合約嘅社區幹事，計劃做咗十幾年都冇取消，局方用陰招將服務外判，嘢就繼續做，服務就繼續存在，但就將轉做公務員嘅期望粉碎！」

全程數據、例子兼備，說話流暢，質問鄧國威更係字字珠璣，亦冇緊張到面紅耳赤，同喺答問大會上口窒窒咁問CY點解唔落實標準工時嘅佢，完全唔可以相提並論。

點解郭偉強嘅口才會喺短短幾日之間突飛猛進呢？有人同我哋講，佢喺答問大會口窒窒，係因為佢當日畀坐喺佢前排、口才了得嘅前輩陳婉嫻(目及)住，緊張得滯，所以條脷至打晒棘，雖然係咁，但佢發言後，嫻姐都有豎起手指公鼓勵佢。不過，睇嚟無嫻姐(目及)實，佢嘅表現揮灑自如啲囉。