政壇：政商定格：陳啟宗話做香港人最好

恒隆集團主席Ronnie陳啟宗尋日幫亞洲金融論壇，負責做一個環節嘅主持，同場演講嘉賓包括中糧集團董事長寧高寧、SOHO中國董事長潘石屹，仲有身兼亞洲水泥董事長嘅台灣遠東集團董事長徐旭東。大家暢談中國經濟社會種種之後，有台下人士發問，台上四位阿總如果可以互換身份，想做邊位嘅時候，經常喺微博發表意見嘅潘石屹就第一個答換做寧總，寧總就客氣話，其他三人對比自己好。徐總就話Ronnie喺內地搞房地產多好。

Ronnie嘅答案就贏得全場最多掌聲，佢一開首就話不要換做潘石屹，雖然對方好有錢，但有時都會被內地機構請飲茶；寧總身處國企，有唔少限制；台灣政府都會畀好多麻煩徐總，有一大堆問題，所以結論都係「香港人最好！」佢仲話香港嘅附加價值好高，叫在座嘅外國人要嚟香港開設辦公室再進入內地，聽到呢度徐總都忍唔住講笑，提議Ronnie收番廣告費。