政壇：政商定格：陳燭光催旺桃花有計

已故教育家陳樹渠嘅千金、投資公司老闆Zandra陳燭光，追死唔少城中才俊，但佢一啲都唔心急，靜待真命天子出現。近日相士話佢知今年桃花大旺，要好好把握。為催旺桃花，佢聽晒相士話，以「大紅大紫」顏色裝身。

日前就撞見身穿橙紅色羽絨嘅佢喺中環ifc行街，睇準鮮色衫褲鞋襪同唇膏，但都係唔多啱心水。最後行經一間甲油專門店，即時眼前一亮，原來店內有玫瑰紅色同紫色甲油，顏色Sharp到極，佢兩支都買晒。記者上前傾偈，佢滿心歡喜話新年時會搽靚指甲，希望行番個桃花運喎！