政壇：搞搞政：張俊勇倡「食」深圳保優勢

近期有言論話深圳食咗香港，但中華總商會會董Thomas張俊勇尋日講到香港面對內地崛起，經濟龍頭地位隨時不保時顯得好憂心，除建議幫年輕一輩創業「增值」同進一步調高最低工資外，更提出香港要「食咗」深圳先至掂！

Thomas提到內地鄰近城市發展一日千里，部分更互相吞併提升競爭力，好似深圳吞併惠州，廣州吞併東莞，再係咁落去香港遲早畀深圳「食」埋，建議香港早着先機「食咗」深圳，包括喺深圳鐵路沿線起樓畀港人住，發展類似「港人深地」嘅房屋模式，方便港人以低價北上置業咁話，諗法都好創新。

雖然佢早前落選港區全國人大代表，但就憑六百幾票獲納入遞補名單，若有人大因故出缺，佢都有機會「坐正」。佢自言首次參選，能夠列入遞補名單已經好開心，揚言嚟緊會多啲接觸唔同界別人士，提早「箍票」，為五年後再戰人大鋪路。