政壇：大狀普通話唔掂難駁嘴

話說大律師公會喺舊年六月訪京，做過大律師公會主席嘅公文袋立法會議員湯家驊無喇喇報咗名參加，其後有公會中人轉告大口湯，話佢畀上面列咗做不受歡迎人物，大口湯惟有自己知趣「退團」。原來當時仲係做緊國務院港澳辦副主任嘅張曉明，一早準備好喺接見公會訪京團時，點名批評大口湯同公文袋黨魁梁家傑等泛民大狀，所以先至透過中間人勸退大口湯，費事佢當面畀人訓話咁尷尬。

事後大口湯向有參與會面嘅大狀打探自己究竟畀人鬧乜，但包括公文袋黨友郭榮鏗在內嘅多名團友，都因為普通話兼記憶力麻麻，只係聽到張曉明有提到佢同梁家傑，但聽唔清詳細內容，「大致都係反中亂港喇！」據聞會面時有部分團友即時離場表示抗議，但唔知佢哋係咪因為普通話唔掂，而無選擇即場發言反駁對方呢？