學店唯利是圖 貪曾誤人子弟

為人父母，望子成龍，呢啲係人之常情。不過咁，如果擇校不慎，撞着見錢眼開嘅學店，「學而優則仕」，隨時變成「學而憂則蝕」，咁就該煨咯。

唔係講笑o架，今時今日嘅所謂自資院校，做生意多過做教育，似學店多過似學校。呢，嶺南大學社區學院及持續進修學院早前被踢爆超收醜聞，校方自己查自己，日前公布調查報告，顯示超收情況比原先曝光嘅更加嚴重，其中副學士先修課程超收逾四倍，簡直不可思議。調查報告歸納咗「九宗罪」，矛頭直指學院前院長同嶺大一位協理副校長，對兩人「極度遺憾」喎。唉，極度遺憾又點吖，誤人子弟呢條數點計先！

嗱，立法會教育事務委員會尋日召開特別會議，討論自資院校超收及質素問題，教育團體及學生齊齊炮轟教育局冇做好監管工作，唔只靠害學生，仲拖垮整體教育質素。而教育局局長吳克儉就話喎，未來會參考教資會嘅建議，朝着統一質素保證機構嘅發展方向研究。

嗱，之前翹埋雙手乜都唔做，家陣醜聞多多，亂象叢生，學生怨聲載道，當局先至話要研究，遲唔遲啲吖？根據港產官僚慢條斯理嘅辦事效率，研究得嚟都唔知又有幾多學生受害喇，叮！

即係咁，冤有頭債有主，自資院校濫收超收，學校固然有責任，而前朝曾蔭權政府好高騖遠，推行所謂教育產業，靠害學生，更加難辭其咎。正如嶺大學生會代表話齋，今次管理層任意妄為，趁「雙軌年」濫收學生，而教育局居然冇統一標準監管，搞到質量毫無保證，事件係教育局之過，係大學商品化嘅惡果。

講到大學商品化，真係火都嚟埋。本港土地資源有限，學生宿舍嚴重短缺，根本冇條件搞教育產業，當局連本地學生嘅需求都照顧唔到，仲花資源打造所謂區域教育樞紐，簡直笑死人。政府好大喜功，自資院校唯利是圖，將教育當生意咁做，將學生當羊牯咁劏，唔亂晒大龍至奇喇！

貪曾誤人子弟，教育產業淪為掛羊頭賣狗肉嘅怪胎，唔該當局速速撥亂反正，以免變成禍港殃民嘅「教育慘業」，叮！