SUN奇古怪：Sun潮語【小三】

最近有單新聞睇完之後好心噏，就係一個中年婦女喺太古城嘅寓所，先勒死自己十歲大嘅仔，然後自盡結束生命。事主早前精神有問題又有自殺紀錄，而導致事主有精神病嘅主因，相信係事主丈夫疑移情別戀引致離婚，女事主抵受唔住打擊而造成嘅。坊間好多人指摘嗰個丈夫，搞婚外情導致家破人亡；亦有不少人指摘嗰個「小三」，拆散人家大好家庭逼死正室。

潮語「小三」，就係第三者嘅意思，亦即係港式粵語所講嘅「狐狸精」、「二奶」、「二廠」、「阿二」。「小三」最初見於國內互聯網，亦有資料顯示係嚟自台灣。姑勿論係嚟自邊度，「小三」意思中都有一種對第三者嘅貶義。一般嚟講有「小三」嘅通常都係已婚嘅男人。屬於包養「小三」嘅高危一族有幾類，第一係「三有」人士，即係「有權，有勢，有錢」；第二類係經常要在外地工作，同老婆長期分隔嘅男人；另一類係嗰啲同太太感情欠佳嘅男性。

但中國傳統社會幾千年嚟都係一夫多妻，所以可能係中國人DNA未追得上時代，以致「小三」呢個問題喺兩岸三地非常普遍。喺中國大陸，甚至去到無官無「小三」嘅情況。大陸有啲女性，甚至以做「小三」為榮，做「小三」竟然成為就業出路。另一方面，好多喺大陸做生意嘅台灣人，都以包養「小三」為樂。因為長期在外，難免寂寞，呢個正好成為啲衰男壞女嘅大條道理。

「小三」有所謂「小三轉」，即係由「小三」轉為正室。但係我想奉勸「小三」們，唔好以為坐正就一定係好事，一次不忠百次不用，難保無下一個新嘅「小三」又嚟要挾，又趕番你落嚟！正正經經搵個男人罷啦！