政壇：政商定格：鍾國斌貪平緬甸設廠

本身做製衣起家嘅立法會紡織及製衣界議員Felix鍾國斌，本月底會帶六十名廠家去緬甸搵地起工廠，佢話因當地經濟啱啱開放，喺緬甸請一個工人超平，人工大概係東莞嘅五分一咋！

Felix話自緬甸局勢轉趨穩定後，一直想喺當地設廠，最近仲有直航機來回兩地，非常方便。所以月尾佢會同包括唐唐家族間半島針織等紡織界行家飛去緬甸，傾吓喺仰光附近設立港商工業區，規模都唔細，預計投資額達六十億港元，佔地足足九百個足球場咁大。雖然緬甸人工平、稅率低，但Felix都擔心當地有貪污情況出現。