政壇：政商定格：雅虎女CEO被數三宗罪

CNN早前嘅一二年最吸引人物排名榜，雅虎行政總裁邁耶（Marissa Mayer）排行第九，可見呢位女CEO嘅魅力真係沒法擋。但收到風，雖然雅虎大部分員工都勁like呢位女CEO，但亦有少部分員工幾唔鍾意佢，仲用匿名E-mail力數邁耶三宗罪。

嗰位員工投訴邁耶掌舵後，次次開會都例牌遲成一個鐘先到，從未試個一次準時。佢仲話邁耶好似唔知呢個世界唔淨係邁耶自己嘅時間係寶貴嘅咁，其他同事都好唔滿意邁耶呢個壞習慣。E-mail入面又話，邁耶上任後只重視公司嘅軟件工程師，其他部門嘅同事就好似唔存在咁，做到好無癮咁話。嗰位員工最後仲話邁耶請錯人返嚟做高層，個COO、CMO、同HR個阿頭確實係聰明醒目，但講到同人合作就唔多識，兼冇人情味。

封E-mail對邁耶嘅指控唔係老作，連前雅虎員工都話雅虎入面有兩大陣營。唔多like佢嘅員工都好認同封E-mail所講，仲話邁耶重用嘅都係之前佢由Google帶過嚟嘅人，搞到原本一直喺雅虎嘅舊人無晒地位。