政壇：搞搞政：建仔助理嚇窒公民力量

政府尋日刊憲公布沙田區議會田心選區補選將於下周五起至今個月底接受提名，三月十號投票，以填補建仔劉江華加入政府而辭職出現嘅議席空缺。呢區一直都係公民力量嘅地盤，而過去一段時間都係話劉江華會還番個議席畀佢哋，但最近卻忽然傳出建仔想據為己有。

事緣網上流傳一張海報，印有前年區選代表建仔參選沙田市中心選區嘅曾錦銓張相，亦寫有「沙田區議會田心區補選候選人」、「劉江華全力支持」等字句。佢依家係建仔立法會新界東議員陳克勤嘅助理，難免令人聯想到建仔想派佢出選。

一張小小嘅海報就嚇得公記騰騰震。事關公記原已受到劉江華對選民「用完即棄」嘅負面影響，同時又要面對泛民嘅挑戰，如果建仔又派人搶票，到時大家攬住一鑊熟，所以公記諗咗個幾月，都未決定係咪派番潘國山再度參選。潘國山承認係咪參選仲要等公記決定。

不過，克勤仔就誓神劈願話田心議席係公記嘅，所以建仔一定唔會搶，承認今次風波係佢助理貪玩之過喎！