政壇：林健鋒三條一不忘結婚日

建仔立法會議員Ann蔣麗芸日前為咗力挺行政長官CY梁振英，自爆老公都唔記得結婚紀念日，話特首係大忙人，記錯少少有咩出奇喎。雖然佢咁諗，但行政會議成員Jeffrey林健鋒尋日就有另類睇法，佢話咁多年都記得結婚紀念日係一月十一號，因為三條一夠晒易記。

咁啱尋日就係一月十一號，今次Jeffrey抽水真係抽得好合時。佢話結婚三十五年，每年嘅紀念日都盡可能放低工作，抽時間同老婆慶祝，所以從來未試過唔記得結婚紀念日，尋日佢仲專登搵咗張當年結婚嘅相片畀記者睇，佢以前個樣同依家差好遠，唔講都唔知道係佢。

佢又話尋晚同老婆食飯慶祝，仲專登叫埋囝囝林凱章。唔怕阻住兩公婆撐枱腳咩？原來阿仔另有任務，就係負責向老婆大人送花。至於食乜菜、送乜花，Jeffrey就大賣關子，話總之係老婆鍾意就得喇。