政壇：簡Sir孻仔孖男蒲老蘭

喺禮拜二凌晨十二點半鐘，記者發現著名冠軍練馬師簡炳墀孻仔、大律師Terry簡永輝現身中環蘭桂坊，當時戴住鴨嘴帽嘅Terry，一身中褸牛仔褲加長靴打扮，同上周六接爸爸出獄嘅裝束幾乎一模一樣。佢同一名身穿冷衫孭住背囊嘅男性外籍好友，坐喺一間開放式酒吧近門口位置，肩並肩面向外。Terry望落心情靚爆，同好友一邊歎啤酒，一邊柯打咗一支水煙兩份吸。吞雲吐霧之際，Terry興致勃勃攞出手機同好友頭貼頭玩自拍，之後兩人低頭對合照喁喁細語。

臨別前十指緊扣

玩咗成個鐘頭，Terry同好友先至離開，男友人似乎對Terry依依不捨，輕輕擁抱對方之餘，更細心幫Terry整理衣服。Terry亦盡顯君子風度，過馬路時主動拖實男友人隻手，為對方截的士。等咗一陣男友人終於等到車，臨走前不忘同Terry擊掌，再來個十指緊扣，維持數秒至放手。送走男友人後，Terry獨自走向擺花街，到自動櫃員機提款，未幾佢再走向荷李活道，最後走入一間大廈。

現年三十七歲嘅Terry，至今未婚，可謂「鑽石王老五」，而據佢身邊嘅人話，亦唔清楚佢有冇女朋友喎。記者尋日曾致電Terry，問吓佢夜蒲蘭桂坊一事，但未能聯絡上；之後亦打過電話畀簡Sir，簡Sir亦似乎不欲多談而掛線。