政壇：泛民齊變A字膊

上屆立法會通過《公司條例》，當中嘅附例寫明限制公眾查閱董事住址及完整身份證明文件號碼。但舊年七月，大會就《公司條例》恢復二讀辯論時，竟然無政黨提出修正案修改呢啲「自閹」規定，條例最終得到大多數支持三讀通過，預計明年正式生效。

早幾日財經事務及庫務局公布，嚟緊會制訂新《公司條例》下相關附屬法例，公眾同傳媒只可攞到「通訊地址」及身份證明文件嘅部分號碼，就畀人批評收窄公眾知情權同影響傳媒採訪。而當日有份投贊成票嘅泛民尋日竟異口同聲話唔關佢哋事，變晒「A字膊」齊齊卸責。

人民力量陳偉業話當時人力已清楚指出有關條文唔公平，仲話曾同秘書處商量將條文抽出嚟獨立表決，但礙於秘書處當時正「日以繼夜」應付五司十四局拉布，所以人力先打消呢個念頭。佢話當時對議案投下反對票，仲攞埋當時嘅投票記錄出嚟以證清白，仲話現時條文嘅影響已超出當局估計，建議政府修訂後再畀番立會審議。

社會反對即轉軚

有份審議法案嘅白鴿黨涂謹申就話，雖然當日佢同富貴黨劉健儀喺法案委員會講到聲嘶力竭，要求反對禁止公眾查詢，但由於委員會內大部分議員來自工商界，所以最終都通過咗。至於點解三讀投贊成票，佢解釋當時所有修正案係綑綁投票，反對一條等於反對全部，所以先畀佢過喎。

當時都係法案委員會成員嘅公文袋湯家驊就話，政府當時按照英國法例制訂《公司條例》，理據上已好難反對，加上佢當時唔覺得有好大問題，所以就無乜點為意。佢仲話喺大會提出修訂要經分組點票，由於佢知道通過機會唔大，所以最後都選擇放棄喎。泛民當日投贊成票支持《公司條例》，點知今日見到社會反對就齊齊轉軚，做其他嘢又唔見佢哋咁齊心嘅？