列車可無人駕駛 服務須有人問責

有首歌叫《無人駕駛》，其中一段歌詞係咁講嘅：「如乘坐快車，但無人在駕駛，亦無人能預計，哪個站會自動停低。我的感性在駕駛，自然憑直覺，追蹤這一切，是哪一個站，是哪一個人，非我力量控制。」嗱，如果你乘坐一輛無人駕駛嘅快車，唔知邊個站會停低，非你力量可控制，一切憑直覺，你驚唔驚吖？

唔係嚇你o架，咁嘅情況隨時會出現。話說預計二○一五年通車嘅港鐵南港島線，將會採用全自動列車控制系統，毋須車長駕駛。港鐵話喎，列車運行中所有指令全部由控制中心遙控發出，可以提供準確快捷嘅服務，萬一出現故障，乘客可以撳車廂內嘅緊急按鈕通知控制主任，對方會發出指令搞番掂，由於每卡車廂都有獨立動力系統，就算發生問題，列車亦有動力回站疏散乘客。講到呢度，唔知大家覺得開心，定係擔心？

即係咁，依家科技先進，無人駕駛早就唔係乜嘢新聞，連戰機都做得到喇。問題係，港鐵管理水平同服務質素一向麻麻，發生事故成為家常便飯，無人駕駛嘅列車究竟靠唔靠得住o架？正如立法會議員田北辰質疑，訊號系統一旦發生故障，而列車又無人駕駛，如何確保安全。嗱嗱嗱，田北辰曾經擔任九鐵主席，連佢都冇信心，一般市民更加唔使講嘞。

講到底，人嘅因素第一。再先進嘅科技都要靠人操作，如果港鐵管理水平同服務質素冇改善，無人駕駛隨時變成無人負責，乘客唔擔心就假。

提起港鐵嘅管理及服務，真係唔講猶自可，一講把鬼火。港鐵年年賺錢，年年加價，但就隱患多多，事故頻頻，仲要經常喺繁忙時間出事，善後又一塌糊塗，搞到市民狼狽不堪，怨聲載道。日後南港島線通車，對南區居民本來係一件好事，甚至可以講係望穿秋水添，最怕如果無人駕駛列車跪低，當局應變又倒瀉籮蟹，咁就大件事嘞。南港島線預計每日有近二十萬乘客使用，萬一出事而又應變不力咯喎，唔只影響南區，連金鐘及中環亦隨時癱瘓都似。

總而言之，唔怕一萬，最怕萬一，市民唔係抗拒高科技，而係對港鐵管理冇信心。所以話，無人駕駛唔係問題，有人問責至係關鍵，港鐵管理層千祈唔好將善意嘅提醒當耳邊風吖，叮！