SUN奇古怪：Sun潮語【鳩瀏】

「鳩」係鳥類鳩鴿科嘅統稱，例如斑鳩。而斑鳩亦有好多種，有火斑鳩同歐斑鳩，總之係乜鳩都有。白鴿都屬於鳩嘅一種，某政黨以白鴿作標誌，是否同鳩有關就不得而知。根據商務新詞典，「鳩」除咗係雀之外，亦有聚集同搜集嘅意思。至於「瀏」，即係瀏覽，約略睇睇嘅意思。咁潮語「鳩瀏」，係唔係即係好似隻「鳩」咁，眼仔碌碌咁四圍睇吓睇吓呢？潮語「鳩瀏」同雀鳥嘅「鳩」查實無乜關係，咁同乜「鳩」有關呢？

潮語「鳩瀏」中嘅「鳩」係取音不取義，咁點解要取其音呢？我諗都唔需要多講，因為「鳩」粵語讀音係等同某個粗口讀音。「鳩瀏」有兩個意思，第一個係漫無目的地四處上網瀏覽。例如依家啲人搭車，企又好坐又好第一件事就係攞手機出嚟「鳩瀏」。有時上社交網站，有時上討論區，總之係頭耷低，兩眼向site。望住手機手指篤嚟篤去，呢啲為之「鳩瀏」。當然，除咗搭車可以「鳩瀏」篤手機之外，喺屋企或公司無聊亂上網，都算「鳩瀏」一種。

「鳩瀏」另一意思係百無聊賴，無所事事嘅意思，亦可以用「鳩瀏瀏」去形容。例如你三失「失學失業失戀」，日日賦閒在家，唔識趣嘅朋友問你有咩搞，你可以答佢：「無嘢搞……喺屋企鳩瀏瀏囉！」至於呢句潮語嘅出處，就真係有待考證。但係根據資料，「鳩」係一種不大聰明嘅鳥類，甚至笨拙到連築巢都唔係好識，要鵲巢鳩佔先有屋住。詞語亦有所謂「鳩居」，來形容居室簡陋。唔知粵語粗口中嘅戇X，又會唔會同呢隻笨「鳩」有關呢？