政壇：政商定格：蔡中虎曼谷歎平民泰菜

香港啱啱度過好低溫嘅新年元旦日，不過，城中好多人原來飛咗出外避寒，中銀人壽執行總裁蔡中虎就趁假期飛咗去曼谷，仲捐窿捐罅食正宗泰國菜添！

蔡中虎似乎好享受平民化生活，上次喺電車偶遇佢，講起呢次曼谷之行，佢透露玩咗兩日，做吓SPA，行街shopping，最過癮嘅係兩個人試咗五、六道地道泰菜，埋單都只係六百銖，即係百五蚊港元咋喎，可見佢消費並唔一定要貴。除咗泰菜，佢喺當地仲試吓意大利菜，又讚嗰間餐廳食物質素有水準，啲侍應講英文非常流利。睇嚟，佢對呢次行程好滿意喎！