政壇：政商定格：郭永亮為囝囝大執豪宅

香港青年聯會秘書長兼城中名人許晉亨外甥郭永亮（Andy），結婚四年已育有兩個可愛精靈嘅囝囝，日前撞到佢約咗三位男士密斟，問起至知原來佢位於港島半山嘅大宅啱啱搞緊大裝修，當日正係約裝修公司嘅人傾細節。為咗大裝修，佢哋已經舉家搬到另一個自置單位暫住，希望四、五月份可以搬返去變咗身嘅舊居。

本周三下晝大約四點零，佢哋喺中環歷山大廈一間餐廳傾偈，只見佢哋睇緊圖則同埋一張張繪有電視、梳化等家居擺設嘅彩色圖，約一小時後郭太就現身。事後問佢有乜大搞作﹖Andy話，間愛巢原本係佢同太太嘅二人世界，但隨住兩個囝囝出世，屋企布局同擺設唔係咁啱蹦蹦亂跳嘅小朋友，所以佢不惜落重本將屋企大變身，務求色彩同埋布置得意啲，又冇咁容易撞親，畀小朋友一個快樂成長嘅安樂窩。