政壇：搞搞政：袁國強慨嘆愛很難

律政司司長袁國強（Rimsky）係新政府少有嘅未婚鑽石王老五，尋日係「愛你一生一世」（2013年1月4日）、締結姻緣嘅好日子，咁啱Rimsky早前接受香港律師會月刊訪問都罕有談及未婚之謎，佢坦承喺搵老婆方面好「失敗」，仲自言並非想單身，但就覺得呢個問題比起處理法庭案件仲要複雜。睇佢真係一副「尋愛很難」嘅款。

Rimsky喺訪問中話，工作同生活之間嘅平衡，完全係個人選擇同個性問題，而佢就最享受工作與生活之間嘅比重各佔一半喎。童年時喺黃大仙公屋成長嘅佢，爸爸原來係公務員，從事木匠工作，思想亦好傳統，曾希望佢做令人尊敬嘅醫生，但Rimsky讀緊伊利沙伯中學時，分科未獲理科班取錄，冇得讀醫科、工程學同電腦等科目，爸爸當時都有一定程度失望嘅。

不過，Rimsky喺中四嗰年，因緣際會聽咗個同法律有關嘅職業講座，所以決定修讀法律學科。半年前加入政府做律政司司長，佢對自己嘅定位原來係香港法律服務嘅推銷員。