政壇：莎姐上場 即炒老臣子

新官上任三把火，但通常好少向老臣子開刀，避免激起無謂動盪，不過，我哋就收到風，周梁淑怡（莎姐）做咗自由黨主席唔夠一個月，已經炒咗服務該黨十二年半嘅副行政總幹事蔡耀銘（YM），辭退理由係「唔需要佢留低」。莎姐強調，只係普通人事調動，冇話要削減黨內人手，反而諗緊請多幾個人幫手喎。

YM一直喺黨內專責研究工作，見證住該黨○四年坐擁立法會十個議席嘅風光時刻，亦目擊○八年黨內分裂逐漸走下坡，期間YM一直有獻計，堪稱幾朝元老，無奈最終都要執包袱。YM話，被炒當天曾經向一位高層問個究竟，回應係佢「冇犯錯」，只係唔再需要佢留低喎。

莎姐承認做過一般人事調整，至於YM係咪佢親自下令炒，佢就唔評論太多，總之唔係特登要「炒人」，嚟緊要加強組織同文宣兩項工作，仲會增聘人手添。