政壇：「Tree根」精神 語出驚人

人嘅一生避唔開近憂遠慮，做立法會議員更應該高瞻遠矚，尋日立法會交通事務委員會鐵路事宜小組討論港鐵南港島線（東段），呢條鐵路將會使用無人駕駛嘅全自動列車控制系統，其實呢個系統唔係新鮮事，香港嘅迪士尼線、機場列車都係無人駕駛，但一眾議員卻好似發現新大陸咁，話勁擔心列車無人駕駛就會「追撞」，民建聯鍾樹根繼續貫徹「Tree根」精神，一陣憂打仗，一陣憂海嘯，聽佢講嘢真係驚嚇度十足。

南港島線（東段）全長七公里，車程約十一分鐘。鍾樹根、新民黨田北辰、民主黨胡志偉、工程界盧偉國等一眾議員都擔心無人駕駛系統唔安全，驚架列車會行行吓「跪低」咗喺隧道內，乘客喺冇車長幫手下疏散唔到。當中以樹根嘅「偉論」最嚇人。

樹根話：「如果有災難性嘅事故發生點算？唔好話冇可能呀，邊個諗到福島會有海嘯？可能過幾個月釣魚台（島）打仗，有傻佬丟個炸彈、飛彈過嚟！邊個估到日本仔可能會打香港？」縱使港鐵回應有防撞系統、有後備電源，樹根都繼續憂慮：「咁後備電都壞埋，列車同控制中心失去聯絡點算﹖車上有司機廣播疏散乘客係咪好啲先？」港鐵總機電工程師梁志立冇佢咁好氣話：「咁列車上嘅通訊系統都有機會壞嘅。」