政壇：煲呔針被毓民插爆

香港數碼廣播（dbc）股東糾紛遲遲未解決，dbc董事局主席黃楚標明明已經提議斥資收購股份，但創辦人鄭經翰就以有關條款「不能接受」而令股份買賣告吹。人力立會議員黃毓民曾同有名煲呔針嘅鄭經翰合作主持節目多年，但毓民都對鄭經翰嘅行為睇唔過眼，喺網上連環爆粗狂插鄭，鬧佢「點」一大批人聲援自己其實係搵人老襯，做法無恥︰「滿口仁義道德，咪又係要錢！」

利用市民幫自己撲水

dbc風波不斷，身為立會資訊科技及廣播事務委員會主席嘅毓民一向都有關注事件，亦有出席鄭經翰喺遮打花園嘅集會，仲特登喺委員會召開會議討論事件。不過啱啱度假完返港嘅毓民就突然疑似掉轉槍頭，前晚喺網台連環爆粗狂插鄭經翰利用人攞着數。

黃楚標日前提出收購dbc建議，但反被鄭經翰拒絕，毓民就爆晒粗大鬧鄭經翰滿口仁義道德，其實只係為錢，直斥dbc停牌，鄭本身都有責任︰「又要做英雄，又要攞番啲錢，大是大非我撐你……人哋應承買股份，你又講有啲條件不能接受，點大批人聲援你，搵老襯！無恥！」

毓民嬲到爆粗段片喺網上熱傳，佢嘅拍檔人力議員陳偉業（大舊）尋日就話，毓民咁憤怒都係因為睇唔過眼鄭經翰利用市民幫自己撲水咁話，「又話籌款打官司，依家唔知點，啲錢係咪畀番人吖﹖」dbc風波明明係股東之間嘅商業糾紛，但鄭經翰就以政治打壓嘅名號搵人撐自己，仲無視幫佢做咗嘢而冇糧出嘅員工，除咗被人鬧無恥，仲畀人話係無良僱主。