老牌店舖成回憶 地產獨大百業難

地產獨大，百業艱難，又有老牌食肆因為不堪租金壓力而被迫結業。唉，傳統店舖買少見少，剩下集體回憶，令人既無奈，又感慨！

講緊嘅係位於佐敦，現存歷史最悠久京滬菜館之一嘅北京酒樓，疑因敵唔過業主大幅加租而關門，四十二年歷史畫上句號。嗱，前晚係最後一夜，唔少熟客扶老攜幼到場支持，依依不捨，場面傷感。

其實，類似場面近年經常出現，港人早就見慣見熟。呢，前幾日之嘛，有近半個世紀嘅筲箕灣金記冰室不敵業主加租一倍，惟有光榮結業；而半年前旺角一間獲「米芝蓮車胎人美食」榮譽嘅麵家，因租金狂加五成焗住執笠。今時今日，樓價飆升，租金狂漲，經營成本急升，生意愈嚟愈難做，業內人士估計舊年全港超過六百間茶餐廳結業，問你驚未！

話時話，因為貴租而難以經營嘅又點止食肆吖。家陣除咗大集團經營嘅連鎖店可以撐得住，小本經營嘅商戶被租金壓到抖唔到氣，只能夠掙扎求存，地舖變樓上舖，低層搬到高層，買眼鏡上十八樓，飲奶茶上廿一樓，講起都好笑。最無奈嘅係，喺地產獨大之下，唔少歷史悠久、充滿本土特色嘅傳統行業無以為繼，紛紛走上末路，喜帖街消失、布疋街式微、波鞋街面臨重建威脅……香港遲早剩番金融地產一條街嘅咋。

講嚟講去，都係官商勾結遺禍。貪曾在位七年，除咗傍住富豪黐飲黐食，政策更加大多向大財團傾斜，搞到「高地價、高樓價、高租值」三高問題日益惡化，營商及生活成本不斷上漲，小商戶固然叫苦連天，基層市民更加難頂。咪以為有樓住日子就會好過，唔知幾多人為咗供層樓而節衣縮食，死供爛供，到頭嚟都係為地產商作嫁衣裳。今時今日，港人買唔起樓，租唔起舖，甚至連死咗都冇骨灰龕，你話幾可悲吖！

早前有項國際調查顯示，香港今年嘅生活指數排名急升二十位，已超越紐約曼哈頓等國際都會，呢啲咪就係「三高」嘅好帶挈囉。正所謂，一闊三大，地產獨大唔止導致營商及生活成本上漲，更加令整體競爭力每況愈下，再咁落去，香港遲早瓜得。講到底，香港貧富懸殊惡化，深層次矛盾加劇，港府政策失當，絕對要負上最大嘅責任。係呢，現屆政府口口聲聲要「穩中求變、適度有為」，依家已經上場半年，究竟諗到辦法未吖，叮！