SUN搞作：少膽虫手記：淫黎、推車、壹全霉

少膽虫被淫賤黎打入冷宮之後，無所事事，終於有機會睇吓份《喪報》。唔睇猶自可，一睇就好似上晒癮咁，嗰陣先發覺原來壹全霉都唔係爛通爛透吖。就喺少膽虫睇緊周董有幾多架溝女靚跑嘅時候，有個記者仔走埋嚟問：「睇完未呀，仲要跟番呢單新聞o架我！」

少膽虫依家雖然無咩地位可言，但又豈容呢啲黃毛小子係少膽虫面前撒野？於是少膽虫拍枱狂鬧：「你盲o架？你見唔到我睇緊最新一期嘅《喪報》？入面咁多新料猛料勁料爆料，你跟得邊單呀？你跟得晒先好同我講拎呢份報紙！」

點知記者仔冷冷咁話：「咁算囉。橫掂周杰倫都唔畀我哋採訪啦。」少膽虫不解：「唔畀？尋日又可以報周董嘅？又係創作部同事作o架？」記者仔一手搶咗份報紙，指住個報頭話：「呢份《好報》嚟o架！懵盛盛！」

少膽虫恍然大悟，當時直頭想搵窿捐。但係為咗不失霸氣，只好搶番份報紙，丟去身後，同時講句：「唓！我入得嚟壹全霉做，預咗無好報！」呢個時候，淫賤黎喺房出嚟，見佢拉住架手推車，將《喪報》呀《爛果》呀嗰啲放上一大疊環保紙上面。少膽虫不由得呆了，估唔到壹全霉窮到咁。

「少膽虫！過嚟幫手！」淫賤黎叫咗幾聲，少膽虫先回過神。「你幫手搵吓壹全霉上下，有咩廢紙紙皮，同我收晒佢！」少膽虫猶豫咗一陣，過去幫手推車。

「少膽虫！你同澳門差佬一樣『太傻太天真』呀！」淫賤黎騎騎聲咁笑。「嗰單嘢其實係我過大海撲水時遇到o架！條標題仲係我指定添！你話我下次搵人推埋個阿婆落斜，整單大新聞係唔係仲好呢……」