Sun奇古怪：Sun潮語：【語癌】

癌病係眾多死法裏面最痛苦、最折磨人嘅一種。無論係化療、電療定開刀，治療過程都相當痛苦，仲要未必醫得好。腦癌、血癌、肺癌、胃癌、腸癌、乳癌、睾丸癌……全身任何位置都有機會患癌，真係諗起都得人驚!不過臨近過年，係唔應該死死聲，只係今次呢個潮語「語癌」同癌有關，雖然都係麻煩，但又唔使死嘅，香港地好多政客高官都有「語癌」啦!

「語癌」係最近喺網上討論區常見嘅潮語之一，呢個字顧名思義就係話人語言有病，仲要係絕症嗰隻。但又同一般嘅「語病」唔同。有「語癌」者並非文法不通或用詞不當之類，亦唔係言語病理學方面嘅真實病症。

話人有「語癌」即係話人經常大放闕詞，唔經大腦亂噏一通，或者周不時喺網上發表一啲膠論，甚至一啲白癡諗法同說話，都可以稱之為有「語癌」。

咁「語癌」又有無藥醫呢？如果人蠢係有藥醫嘅話，咁「語癌」就有機會有藥醫嘅。不過話明係癌症，又點會咁易醫得好呢？通常有「語癌」嘅人都有個「膠腦」，如果個腦唔膠，又點講得出有「語癌」嘅膠話。所以要醫「語癌」，我諗要先開腦，搞掂咗個「膠腦」先係治本之法。不過今時今日，「膠腦」同「語癌」都有蔓延嘅趨勢。無他嘅，多得回歸後膠人當道，不斷向市民派膠，當正市民低能。兼且免費電視台又不斷藉大氣電波播送白癡節目，簡化思考淨化語言，導致有啲市民以爛劇思維去判斷一切，呢啲都有助「語癌」擴散。淨係睇當時特首選舉，其中一位候選人爆出婚外情後，即時被全港一大班電視國民C9集團圍攻，就知道爛劇思為嘅可怕。

如果你發現自己有疑似「語癌」症狀，就要立即檢查。至於邊度有得醫？唔好問我，我都唔知。