政壇：搞搞政：何志平為香港問題把脈

前高官何志平係中華能源基金委員會常務副主席兼秘書長，尋日佢哋喺跑馬地搞咗個午宴沙龍，邀請到聯合國大會主席武克．耶雷米奇（Vuk Jeremi'c）出席，並就國際社會關注嘅議題解答現場嘉賓嘅提問，何志平都有為香港把脈，話政府需要多啲祝福、多啲人幫手，港人需要多啲國際視野、少啲地方主義喎！

何志平話，佢退咗休後主力做民間外交嘅事務，希望促進中國外交文化發展。講到香港問題，佢認為香港係多元社會，有唔同嘅聲音係必然嘅事，而對於近年遊行常見高舉港英旗嘅情況，佢就話因為部分港人嘅地方主義仲係好重，香港人應該高瞻遠矚一啲，擴闊自己嘅國際視野。

委員會下月二十號仲會請中、美、日嘅學者專家講三國關係，睇嚟何志平做唔到政務司副司長，依家不時搵猛人講吓國際形勢，研究國際事務，都算喺曲線服務社會。