政壇：工聯嫁女 麥美娟做「姑奶」

工聯會小花劉桂容（阿容），尋日同黨內拍檔、荃灣區議員葛兆源拉埋天窗，結束六年愛情長跑。一對新人尋晚喺荃灣一酒家筵開六十幾圍，聲勢之大好似工聯會嫁女咁，黨內一眾老將，包括榮譽會長陳婉嫻、黃國健同王國興當然有到賀啦。

同新郎親如姊弟嘅立法會議員麥美娟（Alice）自詡「大姑奶」，直言當正自己結婚咁高興。佢尋晚單拖到場，除大手筆買金鏈作賀禮，仲要求新人跪地斟茶孝敬佢呢個「大姑奶」添！葛兆源憶述第一次表白時對方竟然瞓着咗，第二次帶同禮物，諗住上門慶祝阿容生日時，亦因去錯樓層而摸門釘，好彩兩人喺樓下相遇，葛兆源亦把握機會表白，先有今日咋！