政壇：老嫩新官係無殼蝸牛

近期從政界躍入官場做政制及內地事務局副局長嘅劉江華，同由傳媒界進身財政司司長政治助理嘅羅永聰向政府提交個人利益申報資料，兩個官場新貴雖然一老一嫩，但共通點都唔少，就係大家都係「三無人士」，冇物業、冇車位、亦冇開公司。不過，呢對政壇無殼蝸牛都唔似得晒，因為劉江華依家冇物業揸手，係因為賣咗未買番，出於佢嘅投資眼光同選擇，絕唔係買唔起樓。

熱廚房最忌有臭史

加入政府呢個熱廚房，官場新貴炒唔炒到一手好餸係後話，最重要係身家清白同唔好有啲陳年臭史，搞污糟個廚房要人執手尾。劉江華同羅永聰嘅個人利益申報資料日前喺網上公開，劉江華名下竟然冇物業，最低限度可以擺脫僭建嘅煩惱，不過，家吓租人樓住嘅佢原來早兩年仲有樓揸手，係一個馬鞍山面向吐露港嘅海景自置業物，只係前面興建新樓，令佢嘅物業冇咗個海景，所以佢激氣下喺二○○九年尾賣咗。

當時佢曾經話搵啱會再買番，不過，一○年至今，樓價升完又升，睇怕佢層舊樓都可以賣貴一倍，而劉江華要再上番車、仲要維持海景，筆數襟計囉，或者係咁，佢至今仲係租樓住。不過，家吓劉江華轉入官場、人工大升，又收咗上屆立法會筆約滿酬金，搵番個殼冇難度。其他利益方面，劉江華仲申報政治聯繫，同埋有馬會與兩個同鄉會嘅會籍。

至於另一新貴羅永聰就真係身家清白喇，冇資產外，連政治聯繫、甚至會籍都冇個，唯一新資訊係佢太太叫許雅婷，任職教師，將來幫財爺制訂預算案時，肯定唔會有利益衝突。