電池廢膠當肥料 港人隨時食毒菜

內地黑心食品防不勝防，沒有最恐怖，只有更恐怖。嗱嗱嗱，話口未完又嚟喇，今次輪到「垃圾菜」，食咗隨時傷肝壞腦，甚至有致癌危機，問你驚未！

係人都知，種菜一係用化肥，一係用有機肥，但唔少內地菜農就兩樣都唔用，佢哋發明咗獨步單方嘅「垃圾肥」。大家咪會錯意吖，講緊嘅唔係廚餘呢類生活垃圾，而係又有毒又難分解嘅恐怖垃圾。

話說本港環保人士最近收到廣州番禺菜農爆料，指當地唔少菜田直接使用未經分類嘅「垃圾肥」，入面包括廢棄電池、舊藥樽、塑膠廢物、碎玻璃、刀片等等，無奇不有。村民透露，當地菜場普遍使用「垃圾肥」，皆因貪佢價錢夠平，一車「垃圾肥」成本二百元，足夠供四畝菜田用兩、三個月。本報記者直擊番禺菜田發現，呢啲「垃圾肥」果然惡臭陣陣，有啲仲發出刺鼻嘅化學味，連淋菜嘅水都發黑，部分農作物明顯變黃，你話呢啲菜有冇問題吖。

正如學者話齋，使用未經發酵嘅垃圾肥料，土壤內嘅重金屬成分隨時畀植物吸收，呢類農作物長期食用會影響肝臟功能，損害小朋友腦部發育，嚴重者甚至可以致癌添。

最得人驚就係，番禺一帶有多個供港菜場，種植菜心、芥蘭同白菜等，菜場因為現菜唔夠，經常會向其他菜場收菜頂檔。即係話，呢啲「垃圾菜」可能已經流入本港，市民分分鐘中咗招都唔知。

菜場唯利是圖，用「垃圾肥」種毒菜，事件經本報深入報道後，當地政府至如夢初醒。廣州市農業局證實已經取樣檢測，最快明日會公布結果喎。

其實，「垃圾肥」種毒菜已經唔係一日兩日嘅事，內地當局監管失職，把關不力，依家先至補鑊，遲唔遲啲吖。再講喇，內地官僚敷衍塞責，做嘢效率有幾高，大家心中有數，如果佢哋真係負責任嘅，就唔使搞到黑心食品賣通街喇。

嗱，內地供港菜場被「垃圾肥」菜場包圍，好可能已經淪陷，港府官僚千祈咪掉以輕心吖。依家可以點做？除咗同內地溝通，密切注視廣州當局嘅檢驗結果，更緊要就係加強抽驗把關，將毒菜拒諸門外。

開講有話，知恥近乎勇。前排致癌毒油攻陷本港，當局反應遲鈍，監管漏洞百出，畀市民鬧爆，如果再畀垃圾毒菜殺到埋身，港產官僚想唔畀人嗌落台都幾難，叮！