SUN搞作：打橫嚟講：香港社會分化同撕裂的成因

香港聖公會大主教鄺保羅於聖誕前夕，發表聖誕文告，指香港社會在過去一年，大部分時間都令人感到厭煩和不安，並謂社會各階層陷入互不信任、互不尊重的境地；他更不諱言直指整個社會已經陷入分化、撕裂的深谷。邊啲人分化撕裂呢？大主教舉例證之：「市民與政府、貧與富、本地人與新移民、立法與行政機關。」果真一語中的，觀察無訛。

香港點解由一個本來令全球華人羨慕嚮往的天堂，變成家陣大主教形容得似地獄的幽暗廢墟嘅呢？

講嚟講去，就係呢個地方突然再無人尊重誠信、再不是憑能幹和實力上位、再毋須顧慮人格品德；相反，亂開支票，不兌現也當平常；用人唯親也不打緊，最PK的，係分贓酬庸，派位給啲犯眾怒嘅廢柴，人品唔衰唔臭的，也不重用，當香港人全部傻嘅咁不加理會，咁又點會唔「感到厭煩和不安」吖！

分化局面，香港政府要負最大的責任，好端端話想聽市民意見，嗰頭就派中策組仿照大陸維穩，自組新班子上街抗衡坊眾，但看見此班「戲子」的「素質」（大陸用語），真叫人嘔飯，咁點會和諧呢？分裂就有份。

昨日，網上面爆出，有自詡愛國集團，以兩舊水請人撐CY，cheap成咁，死唔死吖！

神劇《天與地》有段神級對白：「和諧，不是一百個人說同一番話；和諧係一百個人，有一百句不同的一番話之餘，而又互相尊重。」

不斷靠心計玩陰謀手段、靠謊言呃人，只會落地獄！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府