政壇：政商定格：袁振寧團購青森蘋果

內地生產嘅富士蘋果被揭發濫用違禁農藥之後，間接令正宗日本富士蘋果價錢貴幾倍，縱橫遊業務顧問袁振寧（CN）最近就喺網上發起團購，大手買入日本青森縣生產嘅富士蘋果，結果大受歡迎。佢介紹富士係蘋果嘅品種之一，淨係日本就有好多唔同地方種植。

佢話青森縣種植嘅蘋果賣相唔係最靚，但係甜度達十四度，咬落爽脆清甜。青森縣縣長三村申吾呢一日都來港推介當地蘋果，佢着上印滿紅色蘋果圖案嘅恤衫，好風趣咁推介，仲即場教路點揀靚蘋果，佢話，外皮唔好太完美，事關農藥落得太重手至會冇瑕疵，而蘋果底部愈圓愈香甜。不過，佢都建議唔好一日內食太多，否則就有糖尿病喇！