政壇：搞搞政：劉江華過局長癮

政府委任建仔前副主席劉江華做政制及內地事務局副局長，佢旋即於上周五履新，趕喺聖誕節來臨前入職。民間尚未消化佢嘅任命，轉個頭已爆出更震撼嘅消息，原來佢埋咗位僅四日就即刻署任局長，一個官場新丁，會唔會太快呀﹖

劉江華嘅署任安排係由二十五號到三十號為止，呢幾日，佢將會掛住「署理局長」嘅身份理事，因為佢嘅上司、政制及內地事務局局長譚志源聖誕節休假，所以劉江華咪新丁都焗住上囉。不過，劉嘅署任安排雖然已經喺星期二開始咗，但聽聞劉上星期五先至履新，政府都趕唔切同日刊憲署任安排，所以要拖到明日嘅憲報補番。

回想劉江華上任首日，先多次表示會努力學習、虛心聆聽，點知學咗僅四日就做局內一哥。有趣嘅係，究竟劉江華做署理局長嗰幾日係咪照收局長人工﹖原來問責官員之間署任係補水嘅安排，所以劉江華署任局長期間仍然照袋副局長人工，即係十八萬！