政壇：蘇家碧過冷河坐正工總

政府廚房愈來愈熱，近年有唔少喺政府服務多年嘅資深政務官跳船，其中一個就係做過司長新聞秘書及多個部門嘅蘇家碧（Linda），佢離開政府後，「屈就」工業總會總經理一職逾半年，新一年將至，佢都收到好消息，一三年元旦假期完結，佢就可以坐正做工總行政總裁（CEO）。

Linda早前收到政府通知確認，一月二日捱完高官再就業「冷河期」，所以踏入新一年，佢可以即刻喺工總大展拳腳。Linda過完冷河，對工總一眾高層都係件開心事，所以早前Linda已收到政府回覆，工總即刻啟動程序，已於十二月份例行理事會上通過有關任命。