政壇：陳耀璋赴西班牙執平樓

歐洲多國經濟不佳，西班牙更飽受債務問題困擾，已故教育家陳樹渠兒子陳耀璋（Anson）投資有道，佢就睇準西班牙經濟低迷，物業價值下跌嘅機會，有意越洋購入優質物業長揸，仲趁聖誕節遊當地探路，認為依家係時間執平貨。

不過，Anson認為投資同追女仔一樣，唔可以咁「擒青」，切忌聽經紀「齋Talk」，所以佢做足功課，深入了解當地法制。今次初探路，Anson會先與好友考察當地房地產市場，如果遇啱筍盤，聲言豪擲三至五億港元投資都冇問題。除咗西班牙外，英國、法國或意大利，佢都有意投資。Anson中學曾留學加州嘅，講得一口流利西班牙語，對西班牙亦情有獨鍾，最愛係小食Tapas。