政壇：張炳良退股保平安

港府早前重手推出買家印花稅（BSD）及強化版特別印花稅，令原本熾熱嘅本地樓市即刻冷卻，樓市重招仲搞到行會成員林奮強被指涉偷步賣樓，政界亦一片風聲鶴唳，行會成員及高官處理利益申報事宜更加如履薄冰。運輸及房屋局局長張炳良十一月十三號就向行會申報唔再持有一間叫做「佳富貿易有限公司」嘅股份，呢間公司咁啱亦持有一個位於油尖旺嘅商業物業，張炳良會唔會成為另一個踩鋼線嘅人o架？

初步睇嚟，答案係唔會，因為張炳良申報時，已經係政府推出買家印花稅後嘅半個月。無論張只係退出呢間公司，定係呢間公司賣咗物業，由於佢冇再持股，事件應冇乜疑慮。不過，政府呢頭宣布規管埋公司嘅買家印花稅，張炳良冇耐就減持一間持有物業嘅公司股份，係咪覺得政府宣布新稅後，以公司持有物業呢種投資長遠都唔睇好呢？

與匯點關係千絲萬縷

早喺今年七月，張炳良做咗局長後就向行會申報擁有佳富貿易有限公司百分之三點三四嘅股份，但最新嘅申報卻顯示佢已減持，因此亦唔再間接持有呢個公司擁有嘅油尖旺一個商業物業。佢持股咁少，當然同炒賣拉唔上關係，睇番「佳富貿易有限公司」嘅背景，原來係匯點年代遺留嘅嘢。

呢間公司除張炳良持有百分之三點幾嘅股份外，依家做緊公關嘅盧子健、白鴿黨前副主席狄志遠、前立法會議員李華明都有相同數量嘅股份；其他股東仲有黃偉賢、李植悅、陸順甜同陳永誠，心水清嘅人就會發現，以上七人全部有一共通點，就係全部都係白鴿黨前身匯點時期嘅政治人物，似乎張炳良一直同匯點一派關係未斷，直至做局長差唔多五個月先減持呢間公司嘅股份。