SUN微博：打橫嚟講：TVB的民主貢獻

TVB無懼上一劑「一人一票」方式選港姐的失敗，今鋪，勇敢地再試「全民投票」選視帝、視后及最佳劇集。

撇開造假的陰謀論，若「非理性」投票，die hard粉絲感情行先計算，年輕偶像嘅林峯，點睇都唔會輸畀中佬黎耀祥啩！除林峯FANS人數眾多外，網上投票呢家嘢，後生仔玩意也！喜愛中佬的師奶，會揪得低年輕妹？好嘞！講演技、講魅力，祥仔的「太監」，又好得過劉松仁叔叔的「大律師」？所以，黎耀祥的三年冠，事出有因，底蘊何解？問TVB？哈哈！問天問地吧！佢哋嘅官方答案係「選民的力量」。

男女主角跌碎眼鏡，也總不及「最佳劇集」，由超頂心杉的《天與地》獲勝咁來得爆炸。呢套「神劇」之得獎，若TVB果真看民意的話，那票數就一定多到令TVB不敢造次，不可不頒獎畀佢。如果不幸畀我講中，咁網民的力量，咁人民「一人一票」的力量，足可以改變「專政」，改變遊戲規則，強權也不敢再胡作妄為矣！

其實，即使一個商業機構，也十分明白，他們的真實老闆，是一大群平日默言無聲的群眾，要和諧共融，取得雙贏成效，須肯定了解和尊重大眾的要求，而非硬繃繃的亂塞啲垃圾去餵畀人哋食！

網絡動員能力，已戳破獨裁暴政的防火網了！維穩最高境界，就是教育人民有道德，有正念思維，有自由行使做人的基本權利，而不是亂寫埋嗰啲垃圾《藍皮書》。

TVB好嘢！一人一票選賢能，為香港民主作先鋒，抵讚！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk

「就係敢爆」網址tv.on.cc/hot