SUN微博：少膽虫手記：《爛果》推手

少膽虫喺《爛果》向來講盡違心話，成日主張老細對員工應該刻薄啲，咁樣先至有效率，公司賺大錢咯，咪分番一個幾毫畀佢哋開心吓；但係蝕少少嘅話，即炒人再做死班友。少膽虫都講到咁，梗係想話你知《爛果》幾咁無陰功啦！

事緣近排《爛果》創作部作咗單地溝油嘅大新聞，公司上下都慶幸終於唔使再做CY，特別係淫賤黎，開心到叫咗班按摩嘅姐姐仔嚟堆填區，成班諗住有重賞嘅記者編輯睇到眼定定，但係當見到佢哋魚貫地行入淫賤黎間房，竟然係服侍自己一個！無錯，係自己一個！

點知入咗去無耐，淫賤黎忽然大叫：「都唔好肉地嘅！肥豪！肥豪，你過嚟！」編輯肥豪啱啱做完嘢，買咗一大兜薯條狂食，聽到都呆咗一呆。咁少膽虫此時梗要發揮大太監本色，即刻幫手嗌埋一份：「肥豪快啲行啦！成日遲到，淨係識食！你以為請你呢班大編輯返嚟做兩個半版就算咩？快快手入去啦！」

肥豪烚吓烚吓咁行入房，見到淫賤黎剝光豬咁趴喺床上。肥豪舔一舔自己油淋淋嘅嘴，問：「搵我咩事？」淫賤黎指一指自己後面話：「推推佢。」

肥豪一面難堪，內心掙扎一番，但係為咗老婆仔女都無計，只好爬上去。「油呢？印度神嗰隻？」肥豪問。「油價太貴，你用住你個嘴啲油先啦！」淫賤黎如此度縮，四周姐姐仔無不鄙視。無奈嘅肥豪忍住淚水，正要伸手向褲頭帶之時，淫賤黎卻大嗌：「叫你推油呀，搞自己條褲做咩？」

肥豪如夢初醒，高高興興地將嘴上嘅油搽勻淫賤黎每一吋肥膏。正要用力推之際，淫賤黎忽然全身痙攣，不住哀號：「好乸硬！我啲肌肉硬晒！啲咩油嚟o架？好辛苦呀！」。肥豪驚惶失措，忙答：「我都唔知！係《爛果》飯堂買番嚟咋！」淫賤黎喺床上翻來覆去，尖叫：「做咩唔提我？嗰啲係地溝油！睇吓！致癌喇依家！」成班同事聽到佢大嗌就衝咗入嚟，一睇兩件肥嘢條條揈，肉騰騰，即刻心諗：該煨咯！