政壇：政商定格：打白色煲呔徐立之醒神

香港大學校長徐立之平時打領呔多，但日前佢出席一個活動時，好罕有咁打咗個純白色嘅煲呔，特別搶眼。徐校長話最近先開始打煲呔，但佢戴住嘅白煲呔唔係自己買，而係重返港大執教鞭嘅前特首辦主任Gabriel梁卓偉送贈嘅。唔知Gabriel係咪以前見得又污又黑嘅「煲呔」多眼冤，所以送個白色煲呔嘅畀徐校長呢？

徐校長話平時好少買領呔，事關返大學都有免費校呔使用，使乜特登嘥錢買吖！仲話打白色煲呔一向係西方嘅社交禮儀，而佢就特別鍾意喺學術頒獎典禮上使用，夠晒禮儀又夠端莊。

聖誕節將至，佢話校務太繁重，所以唔打算外遊，但留港過節一樣有好去處。佢話最近愛上行山，有時上晝開完會時間尚早，就會抽時間去附近行吓山，再沖個涼先返工，個人會特別精神啲。