政壇：搞搞政：KK想森巴女郎陪末日

根據古瑪雅文明嘅長曆法（Long Count Calendar），聽日就係人類文明結束嘅日子，亦即係坊間所講嘅世界末日。喺一眾受過高等教育嘅政商界人士都口口聲聲話唔信有世界末日，但如果真係有，佢哋最想喺呢日前做啲乜呢？

根據非正式統計，好多議員嘅答案都係想同屋企人齊齊做冬過節，靜靜度過人生中最後一日。當中以工聯會立法會議員KK黃國健嘅想法最有創意，佢話會立即使晒啲錢，飛去巴西睇美女跳森巴舞，實行玩到最後一刻。KK話好多年前去過巴西旅遊，對當地食物、氣候及風俗情有獨鍾，但遺憾一直冇時間再去。之不過，依家都趕唔切飛去巴西喇，到時咪變咗「遺願」？

建築、測量及都市規劃界謝偉銓就話聽日會去睇牙醫。乜世界末日都要睇牙？佢笑笑口話：「就算末日都要有棚牙陪住我o架！」