政壇：肥胡多應酬一晚趕兩場

醫院管理局主席胡定旭，雖然已卸任香港總商會同智經研究中心主席，但百足咁多爪嘅佢，依然喺政商界圈中非常活躍，早前就見到佢一晚趕兩場，應酬到夜一夜先走。

上周四晚上約九點鐘見到肥胡喺港島尚圜酒店行出嚟，隨行仲有兩名女友人，行到附近街道登上一部豪華七人車離開，原來係前往中環四季酒店趕下場。當七人車抵達四季酒店後，由於現場泊滿車，三人就喺車與車之間落車，然後一齊步向酒店大門。臨近酒店大門時，肥胡突然急步上前，原來係遇到熟人打招呼，仲企喺酒店門口傾到雞啄唔斷，其中一個熟人疑似係前高官、香港房屋協會主席鄔滿海。

尋日問肥胡當日有乜聚會咁高興，佢就話當晚約咗一班證券界嘅朋友喺港島尚圜酒店食日本菜，咁啱同一晚佢又約咗另一個朋友飲咖啡，所以唔係一齊趕去四季酒店會合其他朋友囉。咁同行兩位女士係邊個？佢話佢哋係兩母女，大家係好朋友食飯敍舊啫！