政壇：陳智思再掌社聯攞分

尋日成功連任港區全國人大代表嘅行政會議成員Bernard陳智思，向來係政壇「公職王」，但自從佢辭任古物諮詢委員會主席呢個燙手山芋，早前又一度傳出佢為鋪路選特首而棄選人大，雖然佢例牌否認傳聞，最後亦參選咗人大，但早排先放風話想減少公職數目嘅佢，尋日又無端端再次出任社會服務聯會（社聯）主席喎！

古諮會吃力不討好

百足咁多爪嘅Bernard除咗係五十幾間公營同私營公司嘅受薪董事外，更「瞓身」兼任八十幾個公共機構同委員會嘅工作，仲未計佢本身嘅家族生意添！身為「梁粉」嘅佢早排就以健康同家族生意為由，婉拒特首ＣＹ梁振英嘅邀請加入問責團隊，只肯擔任行會成員，同時揚言會減少公職數目咁話。

不過，佢放棄公務職銜好識揀，早前因為處理中區政府合署西座評級爭議，而宣布唔再續任古諮會主席，呢邊廂日前古諮會表決西座列為一級古蹟後，另邊廂佢就攬住社聯主席呢個虛位十年唔放，佢舊年先降格出任副主席，但尋日就翻兜升番做該會主席，真係唔知佢究竟想點。

點解食回頭草？相信Bernard都係深明依家嘅市民對特首要求好高，競選形象工程惟有由卸任具爭議性又吃力不討好嘅古諮會開始，轉頭再戴番社聯主席嘅道德光環，樹立為基層發聲嘅形象。所以話，如果聽日世界冇末日，Bernard「更上一層樓」絕對唔係冇可能！