政壇：搞搞政：KK唔知醜自比英皇室

話說民協立法會「超級」議員KK馮檢基上星期三因病入院缺席立法會大會，之後佢原本有公開活動，但最後都甩底，因而令外界擔心佢嘅病情。我哋因此打過幾次電話畀佢，甚至去佢屋企拜訪，但佢都唔肯接受訪問，點知佢尋日就喺社交網站貼文，話本報報道令佢同民協區議員不斷收到電話查詢，有街坊好擔心，有位仲喊到收唔到聲添！

最搞笑係，KK竟然搬出澳洲電台DJ冒認英女王打電話去醫院查探凱特病況嘅例子，話傳媒唔識吸取教訓。佢缺席會議，未能就特首梁振英嘅不信任動議投票，仲要將臥床醫院嘅相片放上網，大家對佢嘅健康產生懷疑都算係理所當然，更甚嘅係佢有乜事可能要補選，補選隨時被騎劫變成公投。不過，KK唔接受訪問之餘，仲要自比為皇室成員，認真「硬膠」兼牽強。