政壇：貪曾「飛釘」出街影響市容

呢排天氣忽冷忽熱，天文台仲話下星期平安夜氣溫更會跌到十三度，各位長者緊記要小心保暖，否則好易會冷親。好似「貪曾」前特首曾蔭權爵士咁，尋日就見佢着番件樽領長袖衫保暖，但佢就冇着底衫。須知道，有時一件底衫，勝過出面着幾件面衫，貪曾着面唔着底，結果就搞到凸點「飛釘」，但佢係咪凍到「飛釘」就唔知嘞，淨係知道佢肉騰騰「飛釘」影響市容啫！

貪曾近月返咗香港後經常蒲頭，但去親邊都着到好似落街咁，尋日朝早佢去跑馬地聖瑪加利大教堂嘅時候，就着咗件薄身又貼身嘅樽領長袖衫，可惜佢一身豬腩肉，着住呢類貼身保暖衣，將佢一截接一截嘅肥肉表露無遺，唔着底衫更令胸前凸點「飛釘」，認真核突，配上一條西褲，更加不倫不類。

佢一件貼身樽領衫就搞到「玲瓏浮凸」乜都有齊，最慘係佢懶有自信，喺教堂祈禱約半小時後，拎住部平板電腦懶有型咁昂首闊步行出來，好心啦，當年佢兜踎時都做過「清潔大隊長」o架，點解好似唔知咩叫影響市容嘅？