政壇：議員大呻選舉冤屈

立法會政制事務委員會尋日討論選舉管理委員會提交嘅第五屆立法會選舉報告書，可能啲議員喺選舉期間受咗唔少氣，怒氣未消，屈得耐終於大爆發，猛咁投訴選管會有乜做得唔啱，真正關心種票問題嘅議員唔算太多。

公專聯莫乃光喺會上率先發炮，話資訊科技界素來被指係「種票溫床」，令佢哋形象大受影響。佢引述之前有報道話有會員好多年都冇交會費但仍可做選民，之後政府對此大力打擊，反而令到有資格嘅選民唔敢投票，搞到佢連自己個界別有幾多選民都唔知。

論壇粗口橫飛

白鴿黨主席劉慧卿就投訴，有人利用票站調查進行選舉工程，但就唔使計入選舉經費，而當局喺要求票站調查團體簽咗承諾書後冇乜點跟進，搞到啲人有恃無恐，令佢不知幾憤怒喎！

旅遊界姚思榮就話，亞洲博覽館點票站明明可以容納好多人，但點票嗰日就有政黨背景嘅支持者提早入場霸晒啲地方，搞到之後嚟嘅人入唔到，要求當局下次安排得好啲，唔使其他人唔知去邊度等點票結果。

喺選舉論壇上多次被攻擊嘅新民黨主席葉劉淑儀，投訴有政黨支持者成日指住候選人謾罵，嚴重影響候選人心情。佢除要求當局檢討「公平時間原則」外，仲投訴喺戶外舉行嘅論壇上，有政黨支持者會提前霸晒啲位，令到整個論壇粗口橫飛。佢仲話有人仲會大聲叫人花名，覺得呢啲行為唔要得。

群情洶湧，選管會總選舉事務主任李柏康都即時承認喺選舉期間收到唔少投訴，會繼續收集市民嘅意見，如果有需要會放寬公平時間原則，同埋制訂新指引。

其實呢班議員雖然喺選舉期間受咗唔少苦，但總算贏到議席，仲嬲乜吖，始終好過嗰班選唔到嘅候選人吖！