SUN奇古怪：Sun潮語【SB】

中國大陸地大物博，各省各地有唔同方言。有屬於自己嘅俚語方言，我諗花幾世時間都學唔晒。現今互聯網發達，有時上國內網站或討論區，真係隨時睇完成篇嘢都唔知噏乜！因為網民好多時都用自己地區方言，仲要化為網上文字，想理解真係頭都大埋。

今次介紹一個比較常用方言嘅英語簡寫，可能很多人都見過用過，又或者見過但唔知點解……呢個就係「SB」。

「SB」其實係普通話傻B嘅網上英語簡寫，早在QQ或ICQ時代已經出現。咁「傻B」又係乜嘢意思？「傻」就係「傻子」，「B」就係女性嘅私處，「傻B」本身係東北方言，亦算係髒話，其實港式粵語都有句相似嘅嘢就係「傻西」，當然「傻西」嘅「西」並唔係東南西北個西，至於係乜「西」就同「傻B」個「B」意思一樣。

「SB」或「傻B」意思都係話人傻B，呢個東北方言，同好多地方言一樣，都係無中文字對應嘅。而鬧人「傻B」係比較廣東話鬧人「傻西」溫柔得多，所以很多國內女子都會用呢句傻B嚟撒嬌……即係好多港女話人「傻豬」詐嬌一樣。

今時今日，香港人對好多國內女子嘅認識，肯定比我多，我亦無謂班門弄斧。不過香港地最近真係人人都做咗「SB」！咩唔係呀？香港依家政局大混亂，政府咩都做唔到。政客加政府將我哋班市民個個好似「SB」咁舞！不過，你傻我唔傻，邊個講大話邊個係人係鬼我哋一眼睇到，如果當權者繼續當我哋係「SB」就後果自負，到時睇吓邊個傻，我請佢食燒鵝！