政壇：搞搞政：傳劉江華做官克勤仔升呢

政壇想上位，關鍵要睇跟邊個，同埋有冇位上。本地「萬人黨」建仔民建聯明年四月舉行換屆選舉，現任副主席劉江華好大機會加入政府出任政制及內地事務局副局長，辭任黨副主席勢在必行，據聞佢個副主席位好大機會交波畀黨友立法會議員陳克勤，克勤仔由○四年循新東選立法會開始，到家吓喺黨內上位，真係多得劉江華帶挈，難怪畀人話佢係掹衫尾都掂嘅最佳示範。

本報早前率先報道，劉江華極有可能加入政府，劉尋日首度開腔回應，並無否認，只係話不評論事件，當問及做副局長係咪「屈就」時，更表明心迹話喺不同崗位都係為市民做事喎。不過，佢入政府就令建仔出現領導層階梯轉移，有傳建仔開始醞釀三個「升呢」人選，分別係克勤仔、新界東「票后」葛珮帆及新界西扎根多時嘅陳恒鑌，其中又以黨內資歷較深嘅克勤仔看高一線。克勤仔回應升呢傳聞時強調會做好本分，又話無論邊個做都好，最緊要為黨大局出發喎。